Gintuldukan eon it Bureau of Customs (BOC) ro pagguba sa mga nakumpiskang smuggled vehicles.
Sa baylo nga tumkon, igabaligya eon lang sigon ro mga raya agud nga madugangan ro pondo it gobyerno.
Base sa impormasyon, kapin sa 20 nga luxury vehicles ro igapasubasta ag posibleng kumita ro taeatapan it P100 milyon pesos.
Madumduman nga ro pagguba sa mga smuggled vehicles hay ginmandu ni dating Pangueong Rodrigo Duterte agud nga taw-an it paandam ro mga smugglers.
Sa pihak kara, medyu owa it epekto ro nasambit nga diskarte bangud nga padayun sa gihapon ro pagpa-eusot it mga maeahaeon nga saeakyan.
Makaron nga gin-iba eon ro sistema, kabay nga mapundo eon ro illegal nga hilimuon.
Sa pagahimuon nga subasta, dapat nga magpatigayon it maid-id nga background ag character check sa mga magapasakop agud nga masiguro nga indi makaibahan ro mga smugglers.
Raya ro problema bangud nga basi nga magbalik eamang kanda ag mas pa nga kumita ro mga pasaway.
Mabahoe nga hangkat sa bag-ong administrasyon ro problema sa smuggling.
Bukon eamang it saeakyan ro ginapaeusot it mga sugapa sa kwarta kundi ro mismong pangabuhian it nasyon.
Sambilog pa sa dapat nga tutukan hay ro naka-assign sa gobyerno nga nagadumaea sa pagsueod ag pagguwa it mga produkto ukon anumang bagay.
Kumbaga indi maka-eusot ro mga raya kon owa it may nagapa-eusot.
