Nagtaas ro kantidad it nabaton nga remittance it nasyon halin sa Overseas Filipino Workers (OFWs) ko Mayo.
Base sa datos it Bangko Sentral ng Pilipinas (BSP), nag abot sa 2.70 billion dollars ukon katumbas it haeos 152 billion pesos ro nabaton nga personal remittance ko Mayo.
Mas mataas raya it 2% kumpara sa 2.65 billion dollars ukon haeos 150 billion pesos nga nabaton it nasyon sa kapareho nga tiempo ko nagtaliwan nga dag-on.
Bangud kara, naga-abot eon sa 14.02 billion dollars ukon masobra sa 788 billion pesos ro nabaton nga personal remittance it nasyon sa unang limang buean it 2022.
Nagtaas raya it 2.5% kumpara sa 13.68 billion dollars ukon haeos 770 billion pesos nga nailista sa unang limang buean it 2021.
Suno sa BSP, tuga raya it mga ginapadaea nga remittance it land-based workers nga may masobra sa sang dag-on ro kontrata ag mga sea ag land-based workers nga owa pa it sang dag-on ro kontrata.
Mabahoe nga parte it nabaton nga remittance it nasyon hay halin sa mga nasyong Amerika, Saudi Arabia, Japan, Qatar ag Singapore.
