NATIONAL News — Maabu nga mga residente it Bangued, Abra ro mas ginpili nga magpataliwan it gabi-i sa guwa it andang baeay matapos ro magnitude 7 nga linog nga tumama sa probinsiya ag pilang parte it Luzon.
Ginatantiya nga 200 nga katawo ro temporaryong naga-istar sa plaza bangud sa kahadlok sa aftershocks.
Suno kay Mayor Mila Valera, nahadlok ro mga residente nga magbalik sa andang natungdan nga mga baeay nga puro nag angkon it kasamaran ag posibleng magtuga it peligro.
Nasamad man sigon ro mga karsada, tatlong tueay, waeong government facilities, pitong commercial buildings samtang tatlong baeay ro totally damaged ag 36 ro sangkiri nga nahalitan.
Nagpanawagan man si Valera sa anang mga constituent nga bakantehon ro tanan nga mga establisyimento ag ginmandu man ro pagpasarado sa tanan nga mga karsadang paagto sa sentro it banwa maskin ro pag-control sa supply it krudo.
Raya hay bangud nga nag-umpisa eon nga mag-hoard it pagkaon ag naga-panic buying ro mga tawo.
Samtang, nagpatindog eon ro local government it 25 nga modular tents agud nga magsirbing temporary shelter it mga evacuee.
