Kasunod it magnitude 7 nga pag-uyog sa Luzon, nakita ro mga kahalitan nga gintuga kara.
Guba ro mga building, baeay, simbahan, karsada ag iba pang imprastruktura.
Makasueubo nga may mga namatay ag maabu man ro naninahan.
Angot kara, insigida man nga ginpasiguro it gobyerno ro pagsabat sa kinahangeanon it mga apektado it linog.
Personal nga nag-agto si Pangueong Bongbong Marcos ag ro anang gabinete sa mga nahalitan nga lugar agud nga masayuran ro kaeaparon it kahalitan ag insigidang maitau ro ayuda.
Kadungan kara, may iba a sigon nga ginpahaum ro gobyerno para sa pangmabuhayan nga bulig sa mga lugar nga prone sa kalamidad.
Sa anumang sitwasyon kapareho kara, mabahoe nga bagay nga mabatyagan it mga biktima ro madasig nga pagsabat ag pagtatap it gobyerno.
Nagakaduea ag mas nga nagabaskog ro buot nga atubangon ro pagsubok.
Kun nakikita ag nabatyagan it pumueuyu ro suporta it gobyerno, mas madasig ro pagbangon.
Kabay nga indi eon mauman ro mga eksena nga haros binuean eon ro nagtaliwan, owa gihapon nakaka-abot ro bulig hasta nga masamad eon ro mga ginasaligan nga relief goods.
Dinag-on eon ro nagtaliwan hay una gihapon sa mga evacuation center ro mga nag-evacuate nga pamilya.
Nagaeaum kita nga magapadayun ro kahugod it bag-ong representante it gobyerno.
Kabay nga indi mapas-eawan ro minilyon nga mga nagkumpiyansa kana.
Sa uman sa atong mga kababayan nga apektado it linog, magpangamuyo eamang kita ag may kaeo-oy ro
Diyos, uman nga mapatindog ro mga baeay ag pangabuhian nga gin-guba it linog.
Uman raya nga mapatindog it mas mabahoe ag mas matibay kontra sa anuman nga kalamidad.
