KALIBO, Aklan–Ginauean makaron it waea-tuo nga reklamo ro maeubog, mahigko ag maitom nga suplay it tubi it Metro Kalibo Water District sa Brgy. Estancia, Kalibo.
Suno sa tagreklamo nga si Monica Ureta nga masobra sang buean eon nanda nga na-eksperyensyahan ro mahigko nga suplay it tubi kada alas-5:00 it aga-aga ag alas-3:00 it hapon.
Indi eon sigon sanda haeos kainit it tubi, makaeaba ag makapaligos bangud mag-euwas sa maitom hay makatoe pa sa eawas ro nagaguwa nga maitom nga tubi sa gripo.
Masami sigon nga nagabuhay it haeos 30 minutos ro maeubog nga suplay it tubi rason nga nakakaperwisyon eon raya sa mga pumuoeyo.
May kaangtanan kara, gin-engganyo man it pamunuan it MKWD ro mga apektadong konsumidor nga makipag-angot sa andang opisina engkaso nga maka-eksperyensya it mahigko nga suplay it tubi.
Ginpahayag ni Frederick Buenavidez, Public Information Officer it MKWD nga nakaangkon it mainline breakage sa bahin it Capitol area kahapon rason nga naghiwat sanda it emergency repaor ag pagkatapos hay nagpatigayun it flashing para mapagguwa ro tanan nga higko.
Nagpangayo man raya it pasensya sa tanan nga konsumidor nga naapektuhan ag ginpasiguro nga pagatinguhaan nanda nga maibalik ro tamang water quality.
Samtang, pwede sigon nga makapangayo it discount sa andang opisina ro mga konsumidor nga naka-eksperyensya it bukon it manami nga suplay it tubi.
Kinahang-ean eamang nga i-record kung anong oras raya natabo kamana man nga insigidang ireport ukon itawag kanda.
