KALIBO, Aklan–Ginpaathag it sangka ekonomista ag educator sa probinsiya it aklan ro may kaangtanan sa inflation.
Raya hay kasunod it uman nga pagtaas it inflation rate sa nasyon ko buean it Hulyo nga nag-abot sa 6.4%.
Suno kay Mr. Ramon Quimpo, Jr. nga raya hay nagakahueugan nga mas mahae ro presyo it serbisyo ag mga nagapangunang baeak-eon kapareho it gasolina ag pagkaon ko rato nga buean.
Sambilog suno kana ro inflation sa mga pinaka-importanteng datos nga makahambae kon mabaskog ukon mahina ro ekonomiya it sangka nasyon.
Ginasukat kara kun ano kabahoe ro ginsaka sa presyo it mga nagapangunang baeak-on.
Ginpahayag dugang nga ro inflation ukon ginatawag man nga consumer price index ro baeasihan sa interest rates ukon tubo sa utang.
Kon masyadong madasig suno kana ro pagsipa it inflation, posibleng pataasan it Bangko Sentral ng Pilipinas ro interest rates.
Ginabawasan it inflation ro pwedeng mabakae it imong kwarta.
Ginpahayag pa ni Quimpo nga may mabahoe nga epekto sa nasyon ro nagapadayun nga pandemya tuga it COVID-19 ag ro pagsalakay it Russia sa Ukraine.
Maswerte suno kana nga amat-amat eon nga nagabaskog ro ekonomiya tuga it paghaeuga sa mga health restrictions ag owa eon it mga lockdown.
Sa pihak nga parte, kon mahinay suno kana ro iinflation raya hay nagakahueugan nga owa nagagastos ro tawo kapareho it natabu sa pag-umpisa it pandemya.
Bangud kara, posibleng panabaan it BSP ro interest rates.
Samtang, ginlaylay ni quimpo nga magtipid anay ro kada isaea makaron nga tiempo ag kon nagapamakae hay mag-obra it shopping lists.
