Kada may ginataeana nga bag-ong hepe ro Philippine National Police (PNP) ro pirmeng ginapromisa hay ro pagbag-o sa organisasyon.
Iga-reporma sigon raya.
Apang sa katapusan it termino, owa man it naobra nga pagbag-o ag maabu gihapon nga pulis ro sakit it ueo.
Sa makaron, may bag-ong hepe ro PNP sa pagkatawo ni Lt. Gen. Rodolfo Azurin Jr.
Imaw ro ginpili ni President Ferdinand Marcos Jr. sa linya it mga heneral.
Masobra sa sang buean antes nga nakapili si Marcos it bag-ong PNP chief.
Posibleng ginpag-isipan kara it husto kon nagakabagay si Azurin nga pamunuan ro 220,000 nga mga pulis sa nasyon.
Si Azurin hay dating commander it Northern Luzon police ag nagserbisyo man nga commander it Southern Luzon police.
Nagtapos imaw sa Philippine Military Academy (PMA) Makatao Class of 1989.
Natawo ko Abril 24, 1967 sa Paniqui, Tarlac.
Mabug-at ro responsibilidad nga nakapas-an sa abaga ni Azurin makaron nga imaw eon ro PNP chief.
Dikara hay matestingan ro anang kamayad bangud nga bukon eamang ro mga nagapakalhit it kinagamo ag krimen ro anang pagabantayan kundi pati man ro mga kaugalingon nga tawuhan nga nagataeang it daean.
Maabu nga police scalawags nga nagasamad sa imahe it PNP.
Mabahoe ro problema sa illegal drugs ag ginhambae ni Azurin kan-o eamang nga pagapadayunon ro giyera sa illegal nga droga.
Maabu ro problema nga paga-atubangon ni Azurin sa PNP.
Masolbar eamang nana ro mga problema ag maibalik ro kumpiyansa it publiko sa PNP pinaagi sa pagdisiplina sa mga miyembro kara.
