Arestado ro daywa ka mga kaeaeakin-an sa ginkasa nga buybust operation sa Poblacion, Ibajay ku gabie it Dominggo, Oktubre 4.// ro mga suspect hay ginkilaea kanday alyas “Larry”, 20-anyos ag “Jhunly” 18-anyos.
Suno kay PMaj. Frency Andrade, officer in charge it Ibajay MPS, ginkasa ro operasyon matapos ro kapin sa sang buean nga monitoring it mga awtoridad.
Sa nasambit nga operasyon, narekober ro gina-alegar nga dried marijuana nga nakabutang sa papel, kwarta nga naga-balor sa P1,200 pesos ag dugang nga dried marijuana sa pagpatigayon it pag-rekisa sa mga suspek.
Sa makaron, presenteng una sa kustudiya it Ibajay MPS ro mga suspek ag pagapasakaan it kasong pageabag sa Section 5 (Sale of Dangerous Drugs) ag Section 11 (Possession of Dangerous Drugs) it Republic Act 9165, ukon Comprehensive Dangerous Drugs Act of 2002.
Sa pihak nga bahin, sanay eon sigon ro mga kapulisan sa mga negatibo nga komento kada nagapatigayon sanda it buybust operation.
Suno kay PMaj. Andrade, indi pwede nga pabay-an eamang ro mga nagabaligya it ilegal nga droga nga mageapta.
Dugang pa nana nga bukon it kada segundo hay kaibahan it paryente ro andang mga myembro it pamilya kaya bukon it sa tanan nga oras hay na-momonitor it mga raya ro mga aktibidad nga ginahimo it andang mga inunga ukon mga myembro it pamilya./
