Kada may kalamidad ukon iba pang public emergency, pagaeauman eon nga ro masunod hay ro pagtau it ayuda sa mga biktima.
Sa pihak kara, may mga kahigayunan nga owa eagi nakaka-abot ro bulig bangud sa nagkaeain-eain nga rason.
Angot kara, nagpaguwa it updated nga guidelines ro Department of Social Welfare and Development (DSWD) sa pagpatuman it Assistance to Individuals in Crisis Situations (AICS) nga magapadasig sa pagpaguwa it bulig sa mga pamilya ag indibidwal nga una sa mabudlay nga sitwasyon nga nagakinahangean it insigidang suporta.
Sa idaeum it Memorandum Circular No. 15, ginpa-simple ro intake ag eligibility forms ag documentary requirements ag ginpahaba ro validity kara ag gin-ayos ro mga “rate” it bulig ag ro natungdan nga mga awtoridad sa pag-apruba sa Central Office ag Field and Satellite Offices.
Base sa ginbag-o nga guidelines, tatlong tikang eon lang ro kinahangean it kliyente agud nga maka-avail it anumang serbisyo ag interbensyon sa idaeum it AICS program — screening process, interview ag release of assistance.
Rason nga kon ro bulig pinansyal hay manaba sa P10,000 pesos, pwede eon raya nga itau sa sueod it sang adlaw, samtang ro masobra sa nasambit nga kantidad hay pwede man nga ipaguwa sa sueod it tatlo hasta limang adlaw, depende sa dugang nga pag-apruba it mataas nga pamunuan.
Mas madasig eon ro pagpanupod it ayuda, mas madaling makabawi halin sa anumang kalamidad ukon insidente.
Kun may pondo man lang nga gintaeana, indi eon i-delay pa kundi nga ipanupod eagi.
