Maabu ro nalipay sa ginaduso nga makaangkon it kahigayunan ro mga “casual” ukon “contractual” nga empleyadong mabuhay eon nga nagapanerbisyo sa gobyerno nga maging regular, nga may kinamatarung sa mga nagakaigo nga benepisyo.
Raya hay pinaagi sa Senate Bill 234, nga nagatau it civil service eligibility sa mga casual ag contractual nga naka-abot it indi magnaba sa limang dag-on sa serbisyo.
Ginatantiya it Civil Service Commission nga 660,390 sa 2.4 milyong empleyado sa gobyerno ko 2017 ukon 27% ro “job order” ukon “contract of service” ro status.
Kaabuan hay indi ma-regular bangud nga bukon sanda it civil service eligible.
Engkaso nga maaprubahan ro nasambit nga proposisyon, ro mga casual ukon contractual nga empleyadong nakasirbisyo sa gobyerno it indi magnaba sa limang dag-on ag una sa first level career civil service positions sa clerical, trades ag custodial service hay magiging regular eon.
Apang dapat nga owa it pending administrative case ag owa na-convict sa krimeng may kaangtanan sa “moral turpitude, disgraceful ukon immoral conduct, dishonesty, examination irregularity, drunkenness or addiction to drugs”.
Indi man dapat nga dishonorably discharged sa military service ukon dismissed for cause sa anumang civilian position sa gobyerno ro nasambit nga empleyado.
Indi maitago nga maabu sa atong mga empleyado sa gobyerno ro makabig nga angay ag bagay nga mataw-an it mas mataas nga sweldo ag dugang nga benepisyo.
Sanda ro mga mahugod ag tampad sa serbisyo , mga matuod nga public servant.
Kabay nga mataw-an sanda it kahigayunan ag nagaeaum kita nga para sa mga nagakabagay eang ro nasambit nga proposisyon .
Nagaeaum man kita nga magiging mas masaligan ro atong gobyerno bangud nga ro mga nagabilog kara hay mga maaeam, mahugod, disiplinado ag tampad sa serbisyo.
