may mga nakaplastar eon nga mga programa ag aktibidad para sa opening salvo it Kalibo Sto. Nino Ati-Atihan Festival 2023.
Suno kay barangay kagawad mark sy ag tagapaghambae ni kalibo mayor juris sucro nga raya hay pagahiwaton sa Oktubre 8, 2022 sa hapon sa Kalibo Pastrana Park.
Ro event hay igadungan sa ika-100 days sa pwesto it alkalde.
Antes ro pormal nga pag-anunsyo sa pormal nga pagbukas it Ati-Atihan Festival hay magapatigayon anay it anang state of the municipal address si Mayor Sucro sa nasambit nga lugar, kun sa siin may pilang mga dinapit nga bisita sa anang paghathat sa anang mga naging accomplishments.
Magapakigbahin sigon sa opening salvo ro pilang sikat nga banda ag rapper para sa dugang nga kasadyahan ag kalingaw-lingawan it mga magatambong.
Engkaso nga maaprubahan, pagaeauman man ro pagpatigayon it concert ag hydro-party sa ulihing parte it programa.
Gusto sigon it alkalde nga madayun eon ro dating nakasanayan nga face to face nga selebrasyon kaibahan ro mga nagkaeain-eain nga aktibidad.
Apang raya hay nakadepende sa approval it national inter-agency task force bangud nga nagapangatubang pa sa pandemya ro nasyon tuga it COVID 19.
Nauna eon nga gin-anunsyo ni Mayor Sucro sa anang unang Executive Meeting ko July 1, nga ro LGU Kalibo ro direktang magadumaea sa festival sa baylo nga buytan it third party nga non-government organization.
Gin donar man kara ro anang kauna-unahan nga sweldo para sa preparasyon sa festival.
