Joint forces ro nagkaeain-eain nga ahensya it gobyerno para masiguro nga magiging maayos ag eowas ro pagbalik sa eskwelahan it mga estudyante.
Sa Oplan Balik Eskwela, kapin sa 17 nga taeatapan ag ahensya it gobyerno ro nag-ugyon sa taeatapan it Department of Education ukon DepEd para sa paglunsar, kun sa siin ginpresentar nanda ro andang tikang para sa pagpahaum sa pagbukas it klase sa Agosto 22.
Suno sa Department of Health (DOH), ginpabaskog nanda ro pagbakuna kontra COVID-19.
Magabulig man sigon ro ahensiya sa pag-monitor it pagpatuman it minimum health standards sa mga eskwelahan.
Samtang, ro Department of Social Welfare and Development (DSWD) man, padayun ro supplementary feeding program sa pilang pili nga mga eskwelahan, kun sa siin nagakinahangean it bulig ro mga unga pag-abot sa nutrisyon.
Haum eon man ro Philippine National Police (PNP) pinaagi sa pagtukod it mga assistance desk maeapit sa mga eskwelahan agud nga masiguro ro peace and order.
Kaibahan man kara ro Department of Public Works and Highways (DPWH) sa pagkumpuni sa mga eskwelahan .
Ginpasiguro man it Department of Transportation (DOTr) nga bastante ro public transportation sa pagbukas it klase bangud nga nagbukas eon sanda it mga bag-ong ruta it mga bus, jeep, UV Express ag iba pa.
Samtang ro Land Transportation Office (LTO), ag Department of the Interior and Local Government (DILG) man ro nakatoka sa pag-inspeksyon sa mga terminal nga maeapit sa eskwelahan ag sa kabilugan nga daeagan it trapiko.
Ag maabu pa nga ahensya it gobyerno ro nagpasakop sa Oplan Balik Eskwela.
Kadungan kara, ginlunsar man it DepEd ro sangka command center nga haum nga magbaton it mga reklamo ukon anumang isyu angot sa pagbukas it klase.
Mag-eowas sa gobyerno, kinahangean man nga makipag-cooperate ro mga ginikanan ag mismong mga estudyante.
Posibleng sa mga unang adlaw hay mag init ro atong ueo, kabay nga indi kita maubusan it pasensya bangud nga magiging maayos man ro sistema.
Sa makaron, ugalion naton nga magpamati sa mga anunsyo it natungdan , magsunod ag indi maging pasaway.
