Maabu nga kontrobersiya ro Procurement Service of the Department of Budget and Management (PS-DBM).
Pas-an nga krus sa gobyerno bangud nga nadaeahig sa mga bukon it manami nga isyu.
Tiempo eon agud nga bungkagon ro nasambit nga taeatapan agud nga indi eon madugangan pa ro mga ginatuga nga kahuy-anan.
Kon mabungkag, makatipid pa ro gobyerno.
Mabahoe ro budget it PS-DBM kaysa ibang taeatapan it gobyerno.
Pwede man nga obrahon ro procurement maskin nga owa ro nasambit nga taeatapan.
Unang nagtuhaw ro kontrobersiya sa PS-DBM ko nagtaliwan nga dag-on bangud sa maanomalyang COVID supply contract nga gin-award sa Pharmally Pharmaceutical Corporation sa balor nga P42-bilyon pesos sa pihak nga ro capital it kompanya hay P625,000 pesos eamang.
An-um nga Pharmally officials ro ginpasakaan it kaso.
Nakaangkon it imbestigasyon ro Senado apang naduea nga matsa buea ro kaso.
Nakahilway ro mga opisyal it PS-DBM ag Pharmally nga ginpakulong it senado.
Eakot man ro PS-DBM sa mga maeahaeon nga laptop nga andang ginbakae para sa Department of Education (DepEd) nga pagagamiton it mga manugturo para sa distance learning ko nagtaliwan nga dag-on.
Nagabalor it P2.4 bilyon pesos ro mga laptops nga ro kada sambilog hay P58,300 pesos.
Apang natukiban itCommission on Audit (COA) nga outdated eon ro processors, mahinay nga mag-download ag indi makapasar para sa online learning ro mga laptops.
Nasayuran man it COA nga ro laptop hay nagabalor eamang it P35,046 ro kada sambilog.
Pabor man ro senado nga bungkagon eon ro PS-DBM.
Indi eon dapat nga mauman pa ro mga nagakatabu sa PS-DBM ag malikawan eamang raya kon pagabungkagon eon ro taeatapan.
Indi eon maghueat nga uman nga maeakot sa bag-ong kontrobersiya.
