Indi dapat nga paeampason ag dapat nga matur-an it leksyon ro manugturo nga sa unang adlaw pa eang it pagbukas it klase hay natak-an eon eagi.
Raya hay matapos nga nagpakita eagi it anang pagiging ‘bully’ ro sangka titser sa anang unga nga estudyante sa Camarines Norte.
Matsa owa pa kuntento si ma’am sa bakasyon, matsa owa pa imaw naila nga magsueod rason nga mainit ro ueo.
Naging viral sa social media ro post it sangka netizen angot sa inagihan it anang gumankon nga Grade 5 pupil, sa unang adlaw it klase.
Sa panaysayon it netizen, nag-uli sigon nga nagatangis ro anang 10-dag-on nga gumankon nga owa eon nahambae ro natabu kana kundi nga ginsueat eon lang kara.
Na-trauma ro unga matapos nga hambaean it anang maestra it mga masakit nga tinaga kapareho it bobo, bruha ag sapat.
Owa raya nagakabagay nga maging manugturo bangud nga basi ro mga estudyante nga anang pagabuytan hay magbahoe nga maton ag siga bangud sa batasan nga anang ginapakita.
Ginabantayan ro mga bully sa eskwelahan apang ro mismong titser pa ro grabeng magpang-bully.
Samtang, ginkumpirma it Department of Education (DepEd) nga gina-imbestigahan eon ro nasambit nga manugturo ag gina-obrahan eon raya it nagakaigo nga aksyon.
Kabay nga indi raya pagpaeampason.
Maabu eon nga mga reklamo sa mga manugturo nga indi eon masayuran kon ano ro nadangatan.
Raya ro atong pagabantayan kon ano ro magiging penalidad agud nga indi eon pagtuearon it iba.
