Natumod eon sigon it Philippine Coast Guard ukon PCG ro daywa pang pasahero nga una eon nga nareport nga missing matapos nga masunog ro roll-on-roll-off ukon Ro-Ro vessel nga MV Asia Philippines antes paman raya makadungka sa pantalan it Batangas.
Ginkumpirma it joint team it BFP, PNP, ag Special Operations Unit it Southern Tagalog nga tingub nga nag-inspection sa nasunog nga barko nga ro daywang missing nga mga pasahero hay nagsakay kahapon sa ibang barko bandang alas-5:00 ag bukon it sa alas-3:00 nga biyahe it MV Asia Philippines.
Suno kay Capt. Vic Acosta, station commander, it Philippine Coast Guard-Batangas, nga kaibahan sa team nga sumakay sa nasunog nga barko para padayunon ro search operations ag inspection, ginklaro kara nga all-accounted eon ro tanan nga mga sakay it barko.
Kung siin na-rescue tanan ro 47 pasahero ag 38 crews it MV Asia Philippines.
May 70 percent siguro ukon 70% to 60% ro ginatantya pa ni Capt. Acosta angot sa extent it damage it barko.
Sa makaron, indi pa matumod it mga imbestigador ro gin-umpisahan it sunog apang may nakakita nga unang nag-silab ro exhaust it barko.
Samtang, nasayuran man maghalin sa initial assessment it joint team nga ow man it ano man nga traces it oil spill sa lugar maging go ginatawag nga oil sheens sa bisinidad it katubigan kung siin igto eon ro MV Asia Philippines.
Nasayuran nga natabo ro sunog nga may sueod nga masobra 16,000 nga litro it automotive diesel oil ro fuel tank it Ro-Ro ship.
Sa pihak nga parte, ginsupinde eon man it PCG ro lisensiya it nasambit nga barko.
