Maskin nga haeos patapos eon ro pandemic ag amat amat eon nga nagabalik sa normal ro sitwasyon sa nasyon, may pilang sektor gihapon ro hasta sa makaron hay owa pa nakakabangon.
Kaibahan eon kara ro sektor it tranportasyon nga kat nag abot ro pandemic, sambilog sanda sa unang nagapangunang naapektuhan.
Tuga it mga ginpatuman nga lockdown, mabuhay sanda nga nagpundo sa biyahe.
Amat-amat eon nga ginabo-oe ro lockdown ag amat amat eon man sanda nga ginapasugtan nga makabiyahe sa pilang pili nga ruta ag limitadong kapasidad it sakay, rason nga owa pa sanda eubusan nga nakakabawi.
Makaron nga medyu ginapasugtan eon ro 100 percent capacity, ro problema man hay ro grabeng pagtaas it presyo it gasolina.
Maabu sa gihapon nga mga driver ag operator it mga pampublikong saeakyan ro hasta makaron hay eugmok pa.
Rason nga ginahinyu nanda nga maaprubahan eon it natungdan ro andang hinyu nga pataasan ro pamasahe agud nga makadungan sa mataas nga presyo it petrolyo.
Kahapon nga adlaw it martes, matapos ro pilang domingo nga sangkiri nga rollback haeos binawi eagi sa sangka bugso ro pagtaas it diesel ag gasolina.
Kinahangean eon sigon nga maaksiyunan ro andang mga hinyu nga pataasan ro pamasahe bangud nga indi eon masarangan it andang ginakita ro gastos sa petrolyo.
Naghinyu man sanda sa publiko nga kunta hay maintindihan ro andang hinyu nga pagpataas it pamasahe.
Raya hay bangud nga indi eon makasabat sa andang kinahangeanon ro ginakita kada adlaw.
Eabi pa ag owa man it kasiguraduhan kon hin-uno magatapos ro serye it oil price hike.
Rason nga kon ro iba hay amat amat eon nga nakakabangon, ro PUVs kapareho gihapon it dati nga eugmok .
