Bangud sa palpak nga eyebrow tattoo procedure, sangka 32-anyos nga babaye sa Thailand ro nakaangkon it daywang pares it kilay!
Sang dag-on eon ro nagtaliwan, nagpa-tattoo it kilay sa balor nga 1,500 Baht ukon katumbas it P2,300 pesos si Niprapon Meeking sa sangka maisot nga beauty clinic sa Rayong province, eastern Thailand.
Suno kay Meeking, mag-eowas nga barato ro sukot sa mga beauty procedures, ginrekomenda ro nasambit nga clinic it anang amigo rason nga nagsalig imaw nga dikara magpa-tattoo it kilay.
Matapos ro procedure, eubus ro anang pagkakibot kat makita nga ginbutang it tattoo artist ro anang bag-ong tattoo nga kilay sa ibabaw it matuod nana nga kilay.
Ginkompronta nana ro mga staff it clinic, kun sa siin insigida imaw nga ginpromisahan nga ayuson raya it libre sa masunod nga adlaw.
Apang kat nagbalik imaw it masunod nga adlaw, sarado eon ro clinic.
Owa eon nagbukas pa ro clinic ag nagtiis si Meeking nga may ap-at nga kilay.
Gintinguhaan nana nga raya hay ipaayos sa ibang tattoo artist apang nagpamalibad ro mga raya bangud nga indi nana masarangan nga obrahan it remedyo.
Naging viral online ro kamalasan nga naexperiensiyahan ni Meeking hasta nga may sangka tattoo artist sa Bangkok nga nagahingaean kay Pattawee Phumkasem ro nag-offer nga buligan imaw nga ayuson ag paea-on ro palpak nana nga tattoo.
Matapos ro pilang session, naremedyuhan ro anang kilay ag nagbalik eon it uman ro confidence ni Meeking sa kaugalingon.
