Sangka eaeaki sa United Kingdom ro ginpamulta it 65 British Sterling Pounds bangud nga ro anino it anang kotse hay sa disabled only parking space!
Indi makapati ro hardinerong si Matthew Cole kat makabaton imaw it notice angot sa illegal parking it anang kotse.
Mabasa sa notice ngaginpadaea it The Lewisham Council, nag-eabag imaw sa parking regulations it andang lugar.
Kaeakip it notice hay ro litrato kun sa siin makita ro anang kotse nga nakaparada sa sangka unmarked bay.
Kaiping it unmarked bay hay sangka disabled only parking spot.
Makita man sa litrato nga anino eang it kotse ni Cole ro idtu sa disabled only parking spot.
Suno kay Cole, haeos adlaw adlaw umpisa pa ko 2021 hay idtu eon nana ginaparada ro anang kotse sa kada ginahatud ro anang unga sa eskuwelahan kara apang makaron eang imaw nakabaton it illegal parking fine.
Nag apela eon imaw sa city council it andang lugar apang gin-reject ro anang apela bangud nga suno sa The Lewisham Council, ro parking spot hay para eamang sa mga disabled person.
Sa makaron, uman nga nag apela sa ikaywang kahigayunan si Cole ag ginahueat pa kon paga aprubahan ro anang apela ukon kinahangeanon eon nana nga magbayad it multa .
