Gin-anunsyo it Department of Social Welfare and Development ukon DWSD region VI nga may pay-out it educational assistance nga pagahiwaton makaron nga adlaw it Sabado sa ABL Sports and Cultural Complex, Capitol Site, Estancia, Kalibo.
Una kara, nagpaguwa it impormasyon ro ahensya nga uwa eon it pay-out nga matabo bangud nga naubos eon ro pondo nga gin-alokar para sa rehiyon.
Apang, makataliwan ro sang adlaw hay gilayon nanda nga binawi ro nasambit nga anunsyo matapos nga nagpaguwa sigon ro cental office it kapin sa P26 milyon pesos para sa rehiyon nga igapanupod sa mga kwalipikadong benepisyaryo sa nabilin nga daywang ka sabado.
Suno kay Atty. May Rago-Castillo, tagapaghambae it DSWD region VI nga kapin sa 155 nga nagabalor sa P403,000 pesos ro maka-avail it nasambit nga assistance makaron nga adlaw.
Sa bilog nga rehiyon sigon hay kapin sa P13 milyon pesos ro nakataeana nga ipanupod makaron nga adlaw sa 5,000 beneficiaries.
Dugang pa ni Atty. Castillo nga uwa it ginabaton nga walk-in clients kundi ro mga nakarehistro eamang online nga may kumpirmasyon pinaagi sa text messages ag email ro sarang nga maka-avail sa nasambit nga ayuda.
Nauna eon nga ginpahayag ni DSWD Sec. Erwin Tulfo nga limitado eamang ro pondo it ahensya ag sarang nga maka-ayuda sa kapin 400,000 nga estudyante sa bilog nga nasyon.
