Ginaduso it Kabataan Partylist ro hagna nga ‘No Permit, No Exam’ policy sa Manabang Kapueungan it Kongreso agud masiguro nga ro tanan nga estudyante hay mataw-an it oportunidad para sa dekalidad nga edukasyon.
Ginpaathag ni Kabataan Partylist representative Raoul Danniel Abellar Manuel nga imaw man ro author it nasambit nga hagna nga padayon ro pagtaas it matrikula ag iba pang baeayran sa mga eskwelahan rason nga dapat masiguro nga uwa it onga nga mapagkaitan it kahigayunan nga makabueo it eksaminasyon bangud eamag sa problema sa kwarta.
Ginpaathag dugang nga bukon it buot hambaeon kara hay inde eon magbayad ro mga estudyante kundi mataw-an pa it tyansa ro andang mga ginikanan nga makausoy it kwarta pambayad sa ginbueo nga exam.
Gin-insister pa ni Manuel, sa baylo nga striktuhan ro estudyante sa pagbueo it exam hay pwede man nga buytan it eskwelahan ro clearance ukon credentials it mga estudyante hasta nga inde ro mga raya makabayad it tuition.
