KALIBO, Aklan—Ginkadismaya it mga konsumidor ro bag-ong rate increase nga ginpatuman it Aklan Electric Cooperative ukon Akelco makaron nga buean it Setyembre.
Suno kay Rica Balensusa, sangka tag-ana it salon nga ro bag-ong panueuktan hay magatau it dugang nga kalisod sa mga maintok nga negosyante kapareho nanda.
Ginpahayag dugang nga sa makaron hay indi nanda masayuran kon ano ro paga-obrahon bangud nga indi man sanda basta-basta nga maka-adjust ukon makapataas sa sukot it mga serbisyo nga gina-offer sa andang mga kliyente.
Kinahangean eon suno kana nga maghugut it paha makaron bangud nga ro nasambit nga tikang it Akelco sa pag adjust sa andang panueuktan hay indi eamang magatuga it kalisod sa andang mga member-consumer nga owa pa masyadong nakabangon halin sa economic impact it pandemya kundi nga maka-apekto man raya sa mga wage earners ukon mga ordinaryong obrero tuga it inflation ukon mataas nga presyo it mga baeak-eon ag serbisyo kamana man ro presyo it produktong petrolyo.
Nakadepende suno kana sa andang magiging electric bill antes nga magadesisyon kon magapataas it sukot sa andang serbisyo ag nagaeaum nga maintindihan sanda it andang mga customers.
