Matapos ro tatlong dag-on nga pakikipagsukoe sa korte, nagdaog ro bakery nga “Super Pan” kontra sa entertainment giant nga DC comics sa kasong copyright infringement!
Umpisa pa nga unga hay nagabaligya eon it tinapay ro 41-anyos nga si Gonzalo Montenegro sa Santiago, Chile.
Bangud nga pirme nana nga suksok sa paglibod it tinapay ro t-shirt nga may logo it superhero nga si Superman, gintawag eon imaw sa andang lugar bilang si Super pan.
Kat imaw hay nakatipon ag nakapatindog it kaugalingon nga bakery, naisipan nana nga raya ro ipangaean sa anang business.
Naging madinaeag-on ro Super Pan ag sa sueod it 28 anyos hay maayos nana nga napadaeagan ro anang negosyo nga owa it problema rason nga eubus ro anang pagkakibot kat gindemanda imaw it global corporation nga DC comics ko 2020 bangud sa copyright infringement.
Suno sa mga abogado it DC comics, gindemanda nanda ro Super Pan bangud nga posibleng magtuga raya it pagtaeang sa mga nagabakae nga kaparte raya it korporasyon nga DC comics.
Posibleng magtuga man sigon raya it bukon it manami nga imahe sa Superman brand.
Sa sueod it tatlong dag-on, nakipag-away sa korte si Gonzalo ag korondaya eamang nga buean it Agosto, nagpaguwa it verdict ro National Institute of Industrial Property nga owa it gin-eabag nga maskin anuman nga intellectual property ro bakery nga Super Pan ag may kinamatarung sanda nga gamiton ro nasambit nga pangaean sa andang business.
Suno kay Gonzalo, maskin nga nagtau it sakit it ueo kana ro demanda, maskin paalin hay nakabulig man raya sa publicity it anang bakery.
Umpisa abi nga napabalita sa bilog nga Chile ro lawsuit, maabu eon nga nagdayo sa Super Pan agud nga magbakae it tinapay.
