Ginkumpirma it Google spokesperson ko Setyembre 16 nga ro pag-deposit it andang kompanya it haeagang $249,999 sa account it sangka cybersecurity professional hay resulta it human error.
Ko Setyembre 14, 2022, nag-tweet ro IT security engineer nga si Sam Curry angot sa Google.
Suno sa twitter post, nag-deposit ro Google it mabahoe nga haega it kwarta sa anang bank account, tatlong dominggo eon ro nagtaliwan.
Kaeakip it tweet hay screenshot kung siin makit-an nga nagakahaeaga it $249,999 ro gindeposit it “Google Llc Edi Pymnts”.
Suno kay Curry, pilang beses eon imaw nga nagbaton it freelancing jobs sa Google apang owa imaw it project ko kan-o eamang para makabaton it makarondaya kabahoe nga kantidad.
Sa sueod it tatlong dominggo nga pag-contact nana sa Google, owa it nagasabat sa mga inquiries nana angot sa mystery payment.
Rason nga naisipan nana nga mag-tweet angot kara agud nga matueopangdan imaw it natungdan.
Bangud nga nag-viral ro twitter post ni Curry, insigida raya nga natueopangdan it Google ag nagpagguwa raya it statement nga sangka nga “human error” ro natabo.
Pagkatapos makipagkoodinar ni Curry sa anang banko, naibalik eon nana ro tanan nga kwarta sa Google.
