Ginapanawagan makaron it grupo it mga mamamahayag sa Aklan sa Department of Justice ukon DOJ nga padaeman ro imbestigasyon sa kamatayon it broadcast journalist nga si Percy Lapid.
Nakabaehag sa sueat nga ginpadaea it newly-organized Aklan Media Integrated Alliance (AMIA) kay DOJ Secretary Crispin C. Remulla nga makaalarma ro presenteng pag-atake sa mga journalist kon siin nagapanawagan sanda it seguridad ag proteksiyon sa kada mamamayag sa nasyon.
Kinahangean eon sigon nga pagagamiton it otoridad ro angkon nandang kabaskog ag impluwensya para matumod eon kung sin-o ro sa likod it nasambit nga pagpatay kay Percy Lapid.
Kinahangean sigon it gobyerno nga ipabutyag ro kasiguraduhan sa mga mamamayahag nga sanda hay euwas pang magpahayag it kamatuoran, patas ag hustisya sa nasyon nga may demokrasya.
Ro nasambit nga sueat hay ginpirmahan it mga lokal nga mamamayahag it Aklan.
Nasayuran nga ro Pilipinas hay pang pito sa mga nasyon sa bilog nga kalibutan nga maabong mamamayahag nga ginapapatay ag owa naka-angkon it nagakaigo nga hustisya.
