Samtang nagabuhay imbes nga nagaklaru mas pa nga nagiging malabo ro kasong pagpatay sa brodkaster nga si Percy Lapid.
Sa mga bag-ong development sa kaso, indi sa gihapon masabat ro maabu nga mga pangutana angot kara.
Mag-eowas sa pagsurender it nag aku nga gunman ni Lapid nga si Joel Escorial, ro mga masunod nga development hay nagtuga it maabu nga pangutana.
Gin-aku it PNP nga nag-match ro ginsurender nga baril ni Escorial sa slug nga nabo-oe sa crime scene.
Raya hay mabahoe nga ebidensya sa pagpamati it kaso.
Kumpirmado man ro ginhambae kara nga nagbaton sanda it bayad nga P550,000 pesos nga ginhueog sa anang bank account.
Apang ro middleman sigon nga nag-contact kay Escorial nga nakakulong sa Bilibid hay indi pa matumod ro matuod nga pangaean mag-eowas sa apelyido nga Villamor.
Nagguwa sa ginpatigayon nga autopsy it NBI, heart problem ro posibleng rason it pagkamatay kara.
Apang sa parte it PNP, posibleng may foul play.
Makaron hay ginkasa sigon ro posibleng re-autopsy sa bangkay kara.
Naga-inabu ro person of interest sa kaso nga naga-abot eon sigon sa 160.
Gin-eakip eon ro suspendidong BuCor chief nga si Director Gen. Gerald Bantag bangud nga ro ginasugid nga ‘middleman’ nga si Villamor hay nakakulong sa Bilibid.
Haeos adlaw adlaw hay may mga bag-ong pangaean nga natumod sa kaso.
Sangkaterba pa ro mga pangutana rason nga ham-an nga ginahambae it PNP nga solve eon ro kaso.
Suno man kay DOJ Sec. Jesus Crispin Remulla nga bukon pa it ‘sarado ro kaso’.
Paalin nga mahambae nga sarado eon ro kaso nga bukon pa it klaru ro maabu nga detalye ag owa pa natumod kon sin-o ro utok kara .
Pagabantayan kon siin maagto ro imbestigasyon kara.
Maskin medyu mahinay basta siguradong mga tamang tawong eakot kara ro makalaboso.
