Sangka babaye sa United Kingdom ro gintaw-an it restraining order matapos imaw nga ireklamo nga owa raya it pundo sa pagtawag ag pagpadaea it text message sa anang ex-boyfriend.
Ginbawaean it korte ro 28-anyos nga si Michelle Felton nga pa-eapitan, tawgan ag i-text ro ex-boyfriend nana nga si Ryan Harley sa sueod it sang dag-on ag an-um nga buean.
Nag-umpisa ro relasyon nanday Felton ag Harley ko Mayo 2020.
Nakipagbueag ro eaeaki kay Felton ko Pebrero 2022 kat mabatyagan kara nga toxic eon ro andang relasyon.
Owa nagpasugot si Felton nga magbueag sanda ag dikara nag-umpisa ro pagpangharass nana kay Harley.
Umpisa nga magbueag, padayon nga gin disturbo ni Felton si Harley pinaagi sa pagtawag ag pagpadaea it text message kara.
Nag-abot eon sa 120 missed calls ag text messages per day ro ginapadaea ni Felton.
Napuno eon si Harley kat nag abot sa punto nga basta eon lang nga nagabisita ro ex-girlfriend ag naga-aywan raya it mga regalo sa guwa it anang pwertahan.
Bangud nga nahadlok sa anang seguridad, gin-report eon nana sa pulis si Felton.
Matapos ireklamo, insigidang nag aku sa saea nga harassment si Felton.
Nag aku man imaw sa sangkaterbang text messages nga ginapadaea nana nga nag abot sa masobra sa 1,000.
Mag-eowas sa restraining order, ginpinahan man si Felton it sang dag-on ag an-um nga buean nga community service.
