KALIBO, Aklan—Padayun nga gina-usoy it Philippine Coast Guard (PCG)-Aklan ag pamunuan it RoRo vessel nga Starlight ro sangka 24-anyos nga eaeaki nga ginasugid nga nag-eumpat halin sa ginasakyan nga barko bandang alas-11:45 agahon it Miyerkules.
Suno kay Mylene Alsosa, tiya it pasaherong si Vincent Michael Alsosa, residente it Jordan Guimaras nga eubus eon sanda nga nagakabaeaka sa kahimtangan it anang gumankon.
Haeos sang adlaw eon sigon raya nga missing.
Kaibahan it pasahero ro anang igkampod nga maga-uli kunta sa Guimaras halin sa Metro Manila kun sa siin nagatrabaho raya bilang sangka mekaniko.
Nadelay pa suno kana ro biyahe it barko matapos nga ginbalikan ro anang gumankon apang owa raya nakita.
Ko ulihi hay nagdesisyon ro Starlight nga padayunon ro biyahe paagto sa Caticlan port halin sa kaeawran nga sakop it Batangas.
Nagbueuligan sigon nga mag-usoy ro mga tawuhan it barko ag PCG apang napas-eawan ro mga raya nga makita ro pasahero.
Nauna eon nga ginpahayag it anang kaibahan nga igkampod nga matapos nga owa ro biktima sa anang gina-eugban hay nag-report raya sa pamunuan it barko.
Sa pag-review sa CCTV footage, nahagip ro pag-eumpat it biktima halin sa barko suksok ro blue nga jacket ag violent nga sapatos.
Samtang, owa man suno kana it nataeupangdan nga problema nga gina angkon ro biktima antes nga natabu ro insidente.
Angot kara, nagapanawagan ro pamilya alsosa nga kon sin-o ro makakita sa eawas it anang gumankon hay ipahisayod kanda.
