KALIBO, Aklan—Kapin sa P18 bilyon pesos ro gintaeana nga pondo it Department of Agriculture ukon DA para sa fertilizer it mga mangunguma.
Raya hay sa pihak it nagkaeain-eain nga isyu nga nagatuhaw sa ahensya bangud sa sigidas nga pagtinaas it presyo it produktong agrikultura nga nauli ko ulihi sa importasyon kaparehas sa sibuyas ag bawang.
Sa sangka press conference, ginpahayag ni DA assistant secretary Arnel De Mesa nga kinahang-ean it nasyon nga mag-import it mga produkto nga bukon it supisyente sa nasyon para sa mga kinahang-eanon it pumueoyo agud nga inde maapektuhan ro produksyon ag lokal nga presyuhan.
Ginpaathag kara nga bukon it tanan nga lugar sa Pilipinas hay pwede nga tamnan it sibuyas ag bawang kundi sa mga lugar eamang kon sa siin raya pwede nga magtubo ag maka-produce it manami nga klase it produkto.
Sa pihak kara, ro nasyon suno pa kay De Mesa hay uwa eamang naga-import kundi naga-export man kita it mga produkto kaparehas it durian, pinya ag saging.
Sa makaron sigon hay 92 porsyento pang bastante ro supply it bugas sa nasyon apang kinahang-ean gihapon nga mag-import sa oras nga matapos eon ro anihan sa mga kaeanasan agud nga mamintina ro supply sa nasyon.
Madumduman nga sambilog si De Mesa sa mga dinapit nga bisita sa distribution it Rice Farmers Financial Assistance nga ginpangunahan mismo ni Senator Imee Marcos ro pagpasaalima sa mga mangunguma it kapin sa P5,000 pesos nga ayuda nga umabot sa 7,356 nga mga farmers ro nakabenepisyo halin sa pitong banwa sa probinsya it Aklan.
