Ginpasiguro it mga atletang Akeanon ro andang kahauman sa paeaabuton nga Western Visayas Regional Athletic Association ukon WVRAA Meet 2023 nga iga-host it probinsiya sa maabot nga Abril 24 hasta 28.
Suno sa Head Coach ag Trainer it athletic team nga si Jovie Ote nga nagapadayun ro andang in-house training agud nga makapadaea it mga competitive nga atleta sa dag-unan nga sporting events.
Kaibahan sa andang training hay ro pag-adjust it eawas it mga atleta sa grabeng init it paniempo eabi pa ag kaeabanan sa andang hampang hay sa open door.
Ro bag-o eamang natapos nga Provincial Meet suno kana ro nagtau it daean agud nga makapili it mga atletang igasabak it Aklan sa WVRAA.
Ro Athletics ro may pinakamaabu nga medalya nga ginahakot kumpara sa ibang team sports kun sa siin ginaboebanta nga 18 hasta 20 nga medalya ro paga-agawan.
Kapin sa 15 nga mga atelatang eaeaki ag 15 man nga babaye sa Secondary ro maga compete samtang sa Elementary hay 12 ro official line-up sa parehong eaeaki ag babaye.
Ro Athletics Team halin sa power house nga Negros ag Iloilo ro ginapanan-aw nanda nga magiging hugut nga kaengkwentru.
Sa pihak nga parte, ginpahayag ni Ote nga owa sanda it problema sa suporta it Provincial Government bangud nga mag-eowas sa maayos nga billeting quarters hay bugana sanda sa pagkaon.
Ro in-house training hay magatapos hasta sa pagsabak sa WVRAA meet.
Ro mga gold medalist sa WVRAA ro igasabak sa Palarong Pambansa 2023.
