KALIBO, Aklan—Ginklaru ni Punong Barangay Neil Candelario it Poblacion, Kalibo nga owa it eamod pamulitika ro andang ginapatigayon nga pagpamaeay-baeay bangud sa nagahilapit nga barangay election.
Raya suno kana hay may kaangtanan sa pag-update sa record it andang Registry of Barangay Inhabitants nga nakasandig sa sangka ordinansa.
Ginpaathag ni kapitan Candelario nga ro nagapangunang katuyuan it nasambit nga tikang nga masiguro nga ro andang barangay hay may updated nga records it andang residente nga indi eamang makabulig sa madali nga pag-identify it mga pumueuyu kundi nga magaserbi man nga basehan para sa development planning, igatau nga assistance, pagtumod sa magiging shares it barangay sa internal revenue allotment ukon IRA ag iba pa.
Ro ginapa-pil-apan nga form hay ginaeakipan it mga masunod nga impormasyon, pangaean; kompleto nga address; date of birth; place of birth; sex; civil status; citizenship, trabaho ag kompleto nga address it employer kon may trabaho.
Ginatumod man kara ro numero it mga boarders, numero it mga unga , pila ro pamilya nga naga istar sa sangka baeay ukon ro household.
Sa pihak nga parte, ginpasiguro ni kapitan Candelario nga ro right to privacy hay paga-respituhon sandig sa RA 10173 ukon Data Privacy Act.
Ro maka access eamang sigon kara hay ro punong barangay ag barangay secretary.
