KALIBO, Aklan—Kapin sa 17 nga mga pamatan-on ro nagpanumpa sa atubang it mga opisyal ag andang mga ginikanan nga indi eon magahimo it anuman nga gulo sa banwa it Kalibo.
Mag-eowas kara, nagpromisa man ro mga raya nga pagabungkagon ro andang grupo nga nabilog eamang sa social media.
Presente sa nasambit nga pueong ro Kalibo pnp, barangay council ag si sangguniang bayan member Ronald Marte bilang chairman it committee on peace and order.
Suno kay punong barangay Neil Candelario it Poblacion, Kalibo nga pila sa andang plano hay paghugut pa sa implementasyon it curfew hours sa mga minors nga naga umpisa alas 10 it gabi-e.
Kamana man ro pag hugut sa police visibility kabulig ro barangay peace keeping action team ag ro pag activate sa civilian volunteer officers sa kada purok.
Samtang, apela ni kapitan Candelario sa mga ginikanan nga bantayan it husto ro andang mga inunga agud nga malikawan nga mag winarang sa dis oras it gabi-i ag maeakot sa mga gang war.
Ro masubo suno kana nga ro grupo-grupo it mga pamatan-on kon magtaeaeabo sa karsada eabi eon sa dis-oras it gabi-i hay rambol ro kaeabanan nga nagiging resulta.
Nag ugat ro isyu sa pagka-pana sa daywang ka pamatan-on bangud sa gina alegar nga away sa social media.
