Sangka negosyante sa Trang, Thailand ro nag-viral ag gina-istoryahan it mga Thai netizens bangud sa pag-inom it dugo it buwaya bilang health supplement!
Gin-umpisahan it 52-anyos nga si Rojakorn Nanon ro anang agahon sa pag-inom it sangka basong dugo it buwaya nga ginhaluan it Lao Khao, sangka klase it aeak sa Thailand nga himo sa bugas ag molasses.
Sa gabi-i, uman imaw nga naga inom kara antes nga matueog.
Suno kay Nanon, masakiton ag madali imaw nga magaoy apang kat gin umpisahan nana ro pag-inom it dugo it buwaya, nagbaskog ro anang pang-eawason ag nagmayad ro anang pamatyagan.
Natun-an ni Nanon ro pag-inom it dugo it buwaya nga ginhaluan it Lao Khao halin kay Wanchai Chaikerd, sangka negosyante nga nagapanag-iya it crocodile farm sa Ban Pho district.
Suno kay Wanchai, sangkiri eamang ro dugo nga nabobo-oe sa kada buwaya.
Sambilog hasta daywang baso eamang ro mabo-oe halin sa sangka buwaya rason nga ginahaluan nana it Lao Khao ro ginabaligya nana nga ilimnon.
Nagabalor it 300 baht ro kada sangka baso kara.
Bukon eon it kakaiba sa Thailand ro paggamit sa dugo it buwaya para sa ikamayad nga eawas.
Sangka pharmaceutical idtu ro nagagamit it crocodile blood ag crocodile bone extract bilang ingredients sa dietary supplement capsules.
Matapos mag-viral ro angot kara, pilang doktor sa Thailand ro nagpaandam nga indi dapat diretsong imnon ro dugo it buwaya bangud nga bukon it eowas ag posibleng makabo-oe it parasites kon hilaw nga imnon .
