KALIBO, Aklan—Nag apela ro pilang mga member consumer it Aklan Electric Cooperative ukon Akelco nga kon pwede hay duea-on eon lang ro pagpatuman it 2% nga surcharge ukon dugang nga sukot sa indi makabayad it kuryente sa tamang oras.
Suno kay Mary Ann Retilba, sangka tag-ana it sari-sari store nga ipaiway anay ro dugang nga sukot sa atubang it pagtaas it presyo it mga nagapangunang baeak-eon.
Madumduman nga halin sa dating ginaproponer nga 10% surcharge hay gin-obra eon lang raya nga 2%.
Ginpamilit it negosyante nga nabudlayan eon sanda nga maka-eagas sa due date ag makaron hay dugangan pa it surcharge.
Mabahoe nga porsiyento suno kana it andang income hay naagto sa bayad it kuryente kun sa siin pwede kunta nanda raya nga magamit para sa iba pang gaeastusan it pamilya partikular sa pagkaon.
Madumduman nga ro nasambit nga isyu hay sambilog sa mga naging topiko sa ginpatigayon nga Annual General Membership Assembly (AGMA) ko nagtaliwan nga domingo.
Tuyo sigon kara nga maobliga ro mga member-consumer nga magbayad it kuryente sa tamang oras.
