KALIBO, Aklan—Ginpadayun makaron nga adlaw ro pagpanupod it provincial government it cash assistance sa tanan nga mga barangay health workers sa 17 nga banwa sa bilog nga probinsiya it Aklan.
Suno kay Sangguniang Panlalawigan member Jay Tejada it 2nd district it probinsiya nga ginpataasan nanda ro kantidad it ayuda.
Raya hay may kabilugan nga pondo nga P18 milyon pesos nga naghalin sa provincial government apang posible sigon nga sa pagtapos it dag-on hay madugangan ro ayuda depende sa magiging surplus it budget.
Tuyo kara nga mataw-an it pagpasaeasamat ag importansiya ro serbisyo ag sakripisyo it mga barangay health workers nga nagabulig nga napatuman ro mga programa it gobyerno sa primary health care sa mga kabarangayan.
Makabig sigon sanda nga mga baganihan rason nga dag-unan nga ginapatigayon ro pagkilaea kanda ag pagtau it bulig pinansiyal.
Sa bilog nga Aklan hay may kabilugan nga 3,000 nga barangay health workers ro nagbaton it tig P5,600 pesos nga cash ro kada isaea.
Mag-eowas sa mga BHWs hay natigayon man nga mataw-an it cash assistance ro mga day care workers.
