KALIBO, Aklan—Pilang mga nagakaagnas eon nga baboy ag mga kasudlan it sapat nga ginadudahan nga tinamaan it sakit nga African Swine Fever ukon ASF ro nadiskubrehang ginpilak ag ginpaanod sa irigasyon nga sakop it Brgy. Estancia, Kalibo.
Suno kay punong barangay Daisy Andrade it Estancia, Kalibo nga ko adlaw it Huwebes hay may nag-report kanda nga mga residente nga may daywang orok ro nakita sa irigasyon sa nasambit nga lugar.
Sa pag-imbestiga man it news team it Bombo Radyo Kalibo, may nakita man sanda nga daywang ka mga orok sa lugar ag mga kasudlan mat-a it baboy sa Brgy. Pook.
Ginpahayag ni Kapitan Andrade nga posibleng naghalin raya sa ibang lugar ag na-trapped eamang ukon hanang-it sa mga basura rason nga idtu nagpunpon kun sa siin ro andang lugar hay ginakabig nga catch basin.
Nagapati imaw nga owa naghalin sa andang lugar ro ginpilak nga orok bangud nga haeos nagkaea-ubos eon ro mga baboy sa lugar.
Nasubuan man suno kana imaw sa sitwasyon makaron bangud nga naduea-an eon it pangabuhian ro andang mga residente tuga it ASF outbreak.
Sa pihak nga parte, nagpanawagan man si Mrs. Adelfa Baltazar, Presidente it Pook-Estancia-Caano-Andagao irrigation administration sa mga pumueuyu nga maging responsabli ag likawan ro pagpilak it maskin anuman nga bagay sa irigasyon partikular ro patay nga baboy eabi pa ag may outbreak it ASF sa probinsiya.
Pagkakita sigon nanda it mga patay nga orok kahapon it hapon hay nagbayad imaw it mga manugkutkot agud nga mai-eubong ro ginhaw-as nga sapat halin sa tubi nga nagaka-agnas eon.
