KALIBO, Aklan—Nag-aeabutan eon sa banwa it Kalibo ro mga obispo ag kaparian nga kabahin sa ika-126th plenary assembly and retreat it Catholic Bishops Conference of the Philippines (CBCP) nga nag-umpisa eon makaron nga adlaw, Hulyo 3 ag magabuhay hasta sa Hulyo 10 it presenteng dag-on.
Suno kay Fr. Tudd Belandres, kora paroko it St. John the Baptist Cathedral nga makasaysayan raya nga hitabo bangud raya ro kauna-unahan nga kahigayunan nga ginhiwat ro nasambit nga event sa guwa it Luzon.
Mabahoe sigon raya nga dungog ag grasya para sa tanan nga Aklanon kung siin malipayon sanda matapos nga mapili para maghost.
Nasayuran nga naga-abot sa 105 ro mga bisita nga ginakaeakipan it 82 nga obispo.
Nag-abot man kaina it hapon ro Papal Nuncio nga si Archbishop Charles John Brown.
Sa pihak nga parte, ginpasiguro man it Aklan Police Provincial Office (APPO) ro hugut nga pagbantay ag seguridad agud nga masiguro ro kaeuwasan it mga bisita.
Suno kay Pcpl. Leonelyn Artes it Akaln Police Provincial Office (APPO) nga nagpakalhit sanda it mga pulis sa palibot it hotel kung siin pagahiwaton ro mabahoe nga event it Simbahang Katolika.
