KALIBO, Aklan—Kanselado ro biyahe it mga saeakyang pandagat nga may rotang Romblon to Caticlan ag Batangas to Caticlan vice versa bangud sa Bagyong Egay.
Raya hay base sa pinaka-ulihing ginpaguwa nga sea travel advisory it Philippine Coast Guard ukon PCG-Aklan.
Suno kay Coast Guard chief petty officer Dominador Salvino, deputy commander for operations it PCG-Aklan nga bangud nga may naka-bandera nga gale warning sa parte it Romblon rason nga owa ginpasugtan nga makabiyahe ro mga pampasaherong motorbanca ag iba pang mga baroto.
Ginpahayag dugang nga bangud nga nabutang ro batangas sa storm signal no. 1 rason nga ginpundo man ro biyahe it mga roll-on, roll-off ukon RoRo vessels.
Tuga man it mahangin ag mahumbak nga kondisyon it kaeawran hay nagapabilin ro biyahe it mga motorbanca paagto sa isla it Boracay sa Tabon to Tambisaan port.
Mag-eowas, temporaryo nga ginpapundo ro sea sports activities para sa kaeowasan it mga turista.
Sa pihak kara, ginklaru it PCG-Aklan nga owa it naka-alsa nga gail warning sa probinsiya it Aklan.
Apang, otomatikong pagakanselahon ro mga biyahe it mga maisot ag mabahoe nga saeakyang pandagat sa oras nga mabutang ro probinsiya it Aklan sa storm warning signal agud nga makalikaw sa disgrasya.
Sa makaron nagapadayun ro andang pag monitor sa tracking it Bagyong Egay.
