KALIBO, Aklan—Magapatigayon it Rescue Task Force Demonstration sa pagpanguna it Municipal Disaster Risk Reduction Management Office ukon MDRRMO sa Hulyo 28, bandang alas-12:00 it udtruadlaw sa Kalibo municipal building.
Ginpaathag ni MDRRMO head Terrence June Toriano nga ro nasambit nga aktibidad hay magasentro sa active shooting incident nga kaparte eon man it selebrasyon it disaster resilience month.
Raya nga event suno kana hay magaserbe nga preparedness agud nga maging haom ro tanan sa posibleng maga-eontad nga mass shooting nga bukon eon it bag-o sa mga gamhanan nga nasyon kaparehas it Estados Unidos.
Igapatigayon raya nga aktibidad bangud nga may history ro Kalibo ko dag-on 2005 nga may nag-eontad nga pagpamaril kon sa siin natabo raya ko kasagsagan it Ati-atihan festival.
Igademonstrate dikara kon paano ihandle ro kaugalingon kon may mga mass shooting nga magaeontad.
Ro rescue demonstration hay sa pakikipagbueoligan it MDRRMC, Aklan PPO ag iba pang concern agencies.
Raya hay unang kahigayunan nga igapatigayon sa banwa it Kalibo ag bilog nga probinsya it Aklan.
