KALIBO, Aklan—Maga-umpisa eon nga ipatuman sa bilog nga banwa it Kalibo ro “No Segregation, No Collection Policy” it mga basura.
Suno kay Adorada Reynaldo, head it Solid Waste Management Services it lokal nga gobyerno it Kalibo nga base sa nakasugtanan raya hay igapatuman sa bilog nga banwa umpisa sa Oktubre 30, 2023.
Raya hay nagakahueugan nga ro mga residential waste kamana man ro mga basura nga magahalin sa mga pribado ag pampublikong taeatapan hay indi pagahakuton kon owa naka-segregate ukon owa naseparar it tama ro basura ukon ginpaguwa sa bukon it tamang schedule.
Samtang, igatugyan eon sa mga punong barangay ro pag diskarte sa pagkolekta it basura sa kada barangay.
Nagpaandam si Reynaldo sa mga pasaway nga sa oras nga madakpan nga owa naka segregate ro andang mga basura hay paga-sitahon ro mga first offender, apang sa oras nga paga-umanon sa ikaywang kahigayunan hay pagapapanaugan eon it multa nga naga abot sa 1,400 pesos.
Tuyo it tikang nga mapa-intindi sa tanan ro mga dapat nga obrahon agud nga maayos nga mapatuman ro Ecological Solid Waste Management.
