KALIBO, Aklan—Ginaeauman nga makauli it medalya ro nagaisaeahan nga atleta sa arnis maghalin sa probinsya it Aklan nga kaparte it delegado it Western Visayas sa Palarong Pambansa nga maga-umpisa sa Hulyo 31 sa Marikina City.
Ginkilaea it trainor nga si Renegerio Vallejo Jr. ro atleta nga si Mae Bernardino ag residente it Brgy. Nalook, Kalibo.
Si Bernardino hay unang sabak pa eamang sa Palarong Pambansa matapos nga imaw ro nagdaog kontra sa iba pang atleta sa ginpatigayon nga Western Visayas Regional Athletic Association ukon WVRRA Meet nga ginpatigayon mismo sa Aklan sports complex sa Brgy. Calangcang, Makato.
Ginpahayag dugang ni Vallejo nga halin kat gin-eakip it Department of Education ukon DepEd ro arnis sa mga sporting events hay haeos permi sanda nga may ginadaea nga atleta ag nagauli gid it medalya ag kadungganan para sa rehiyon eabi eon sa probinsya it Aklan.
Sa makaron suno kana hay sigidas ro andang pag-ensayo samtang ginahueat ro pag-umpisa it Palarong Pambansa.
