KALIBO, Aklan—Sigidas eon ro intense training it mga atleta maghalin sa Western Visayas bilang preparasyon sa pagsabak sa Palarong Pambansa nga pormal nga pagabuksan sa Lunes, Hulyo 31.
Suno kay Hernani Escular Jr., tagapaghambae it department of education ukon DepEd region 6 nga malipayon sanda bangud nga sa 17 nga rehiyon nga nagpasakop sa Palarong Pambansa ro andang delegasyon ro unang ginbistahan it mga opisyal it DepEd central office agud nga mausisa ro andang kahimtangan sa andang billeting area.
Samtang, gindugang ni Escullar nga owa it pagahiwaton nga mga main events antes ro opening ceremony.
Ginpatigayon man ro sangka solidarity meeting kon sa siin gintalakay ro ground rules ag mga schedule it hampang.
Sa Agosto 1 hasta 5, maga-arangkada ro competition proper kun sa siin ginaeauman nga magatambong si DepEd secretary Sara Duterte-Carpio.
Tuyo sigon it ginpatigayon nga pre national qualifying games hay agud nga mapatag-od ro adlaw it hampang ag mabawasan ro numero it mga players.
Sa pihak nga parte, owa man sigon sanda it na-encounter nga anuman nga problema ag untoward incidents umpisa nga mag-abot ro delegasyon sa Marikina City kun sa siin hugut nga seguridad ro ginapatuman.
Ginapatuman sa billeting area ro curfew ag head count kada gabi-i.
Bastante man ro pagkaon ag owa it problema ro supply it tubi nga pampaligos.
Ro Western Visayas hay nagpadaea it kabilugan nga 813 delegates sa Palarong Pambansa.
Target sigon makaron it rehiyon nga mabo-oe ro kampeonato pinaagi sa paghakot it maabu nga mga gold medals sa nagkaeain-eain nga sporting events.
Ko pre-pandemic Palarong Pambansa, ro Region 6 hay nag pangatlo masunod sa National Capital Region ag Region 4A.
