KALIBO, Aklan—Naging maayos ro unang adlaw it pag-arangkada it Brigada Eskwela it Department of Education (DepEd) sa nagkaeain-eain nga pampublikong eskwelahan sa probinsiya it Aklan bilang pagpahaum sa pagbukas it School Year 2023-2024.
Suno kay Honey Lynn Trias, Principal II it New Buswang Elementary School nga ginkalipay nanda ro kooperasyon nga ginpakita it nagkaeain-eain nga sektor sa pag-umpisa makaron nga adlaw, Agosto 14 it Brigada Eskwela nga magabuhay hasta sa Sabado, Agosto 19.
Raya hay may tema makaron nga dag-on nga ‘Bayanihan para sa matatag na paaralan, tara na mag-brigada na tayo’.
Ginpahayag ni Trias nga ko nagtaliwan nga adlaw hay nagpueong eon sanda kaibahan ro anang teaching ag non-teaching staff para sa andang nagakaigo nga preparasyon.
Sangka mapig-od nga programa ro ginpatigayon kaina sa kick-off ceremony kaibahan ro mga estudyante, ginikanan ag mga education stakeholders nga nagpasakop para sa andang boluntaryong pagbulig sa nasambit nga national schools maintenance week.
Tuyo it Brigada Eskwela nga masiguro nga magiging maayos ag eowas ro pagbukas it klase pinaagi sa paglimpyo sa palibot ag pagkumpuni sa mga gamit ag mga pasilidad it kada eskwelahan.
