KALIBO, Aklan—Ginaeauman ro pagtuhaw it mga sunog sa tiempo it El Niño rason nga nagpaandam ro Bureau of Fire Protection ukon BFP-Aklan.
Ginlaygayan ni FO2 John Vincent Nufable ro publiko nga makaangkon it extra nga pagdahan ag maglimpyo it mga basura sa palibot bangud nga kaeabanan nga nagatuhaw ro sunog kon grabe ro kainit it paniempo eabi eon ro mga grass fires sa mga kabukiran.
Haum eon man sigon sanda sa pagaboe-an it supply it tubi sa pagtuhaw it mga insidente it sunog kamana man nga ginasigurado nga una sa maayos nga kundisyon ro andang mga fire truck ag mga ambulansiya.
Ginpahayag dugang nga bangud sa naga-inabu nga populasyon sa mga urban areas hay eaban ro fire incidents nga matabu tuga it ‘human activity’ kumpara sa mga rural areas nga sangkiri ro tawo.
Plano man nanda nga pabaskugon ro pagbisita sa mga kabarangayan agud nga mapataas ro kasayuran ag magtau it mga safety tips kontra sa sunog.
