Nagapabilin nga bastante ro supply it bueak para sa ngahilapit nga pyesta minatay

KALIBO, Aklan — Nagapabilin nga bastante ro supply it bueak sa flower shop nga nahamtang sa Roxas Avenue, Kalibo para sa nagahilapit nga pyesta minatay.

Suno sa flower vendor nga si Melba Vasquez, mahina pa ro andang baligyaan it bueak sa makaron bangud nga uwa pa haeos it nagabisita sa mga sementeryo bangud nga masobra sang dominggo pa antes ro nasambit nga okasyon.

May mga paaeabuton pa sigon sanda nga mga bueak kon sa siin inde pa imaw makahambae sa makaron kon may pagtaas ukon uwa bangud nga nakadepende ro presyo sa andang mga supplier ag ro pagtransport kara iya sa banwa it Kalibo.

Sa makaron suno kana hay bukon pa man sanda it masyadong masako kon sa siin ro mga order pa eamang hay para sa mga namatyan, kasae ag iba pa.