KALIBO, Aklan—Nagpang-euya ro sangka 20-anyos nga eaeaki matapos nga owa eon ro anang alagang baka nga ginapatihan nga ginbo-oe it mga owa nakilaea nga manakaw sa Barangay Sigcay, Banga ko nagtaliwan nga Enero 28, 2024.
Suno kay Arlie Candelario it nasambit nga lugar nga gina-gihit eon kunta nana ro anang baka bandang alas-6 it agahon, apang owa eon raya sa anang ginhigtan sa bakanteng lote maeapit sa andang baeay.
Ginapatihan nga raya hay gin-guyod ag ginsakay sa sangka puti nga van base sa CCTV footage nga andang nabo-oe.
Nasayuran nga ro baka hay nabdos man ag nakataeana eon kunta nga magatiyo sa buean it Marso.
Kabay suno kana makonsensiya ro mga suspek bangud nga raya eamang ro andang source of income ag napalanggaan eon nana ro anang alaga.
Antes suno kana ro pagkaduea it anang baka, sangka residente man sa lugar ro gintakawan it alagang sapat.
Nagapati imaw nga nagadayo sa lugar ro mga suspek ag ginadaea ag ginabaligya sa ibang lugar ro andang tinakawan nga sapat.
