KALIBO, Aklan — Pagkaeumos ro matuod nga ginkamatay it 15 anyos nga binatilyo nga si Jhuros Flores ko hapon it Enero 29, 2025 sa Aklan River nga sakop it Brgy. Polo, Banga.
Raya ro ginpahayag ni Maestro Prediction, sangka professional tarot card reader, psychic expert ag faith healer halin sa Cavite base sa mensahe it biktima sa anang baraha.
Apang ro masubo suno kana nga maskin ano pa ro obrahon nga pag-usoy sa binatilyo hay indi raya makita bangud nga naging ‘alay’ sigon imaw para sa kaeowasan it mga naga istar sa lugar.
Makabig suno kana nga misteryoso ro lugar nga gin-eumsan ni Jhuros.
Mabahoe man ro anang pagpati nga nadisturbo it grupo it binatilyo ro taglugar rason nga maskin nga owa it intensyon nga magpaligos hay napilitan imaw nga mag-eusong sa suba.
Nabasa man sigon nana sa anang baraha nga maskin nga owa it foul play nga natabu, apang indi masyadong makatueog ro pito nga iba pa nana nga kaibahan bangud nga may sangka untold story ukon matuod nga natabu nga owa pa nanda ginabulgar sa publiko.
Sangka babaye ag sangka eaeaki sigon ro matuod-tuod nga nakasayod sa bilog nga hitabu.
Nakikita sigon nana sa anang baraha nga matsa gin-hangkat si Jhuros it anang mga kaibahan ag napilitan nga batunon ro nasambit nga challenge nga sa owa it swerte hay gulping nagtaas ro tubi sa suba ag aksidenteng inanud raya.
Ginsuhestiyon man it faith healer nga uman nga mabuksan ro imbestigasyon ag makaangkon it one-on-one interview sa mga ulihing naka-ibahan it binatilyo.
Tuyo kara nga maklaruhan ro isyu ag maduea eon ro pagpangbatikos ag bashing halin sa mga netizens .
Sa pihak nga parte, mabahoe suno kana ro posibilidad nga sa ikaywang domingo it anang pagkaduea hay pagapahilwayon ro binatilyo rason nga maga-eutaw ro anang eawas sa may area it Kalibo-Numancia Bridge hasta sa Brgy. Bakhaw, Kalibo ag Brgy. Camanci sa banwa it Numancia.
Nakikita man nana nga indi matapos ro makaron nga buean hay maga-eutaw ro anang eawas rason nga kinahangean nga magbantay sa palibot.
Raya hay kasunod it mga ginpatigayon nga waea-tuo nga ritwal it mga nagkaeain-eain nga albularyo kun sa siin naghaead it dugo halin sa buhi nga sapat .
Sa makaron hay mas pa gid suno kana nga nagakinahangean it tingub nga pangamuyo ukon power prayer bangud nga kon mabusog it pangamuyo ro espiritu it unga hay may posibilidad nga kusa imaw nga makabuhi ag makita eon ro anang eawas.
Sigurado suno kana nga engkaso nga mag-eutaw ro anang eawas hay maabu ro makibot ag magiging palaisipan sa tanan nga mga tawo ham-an it bilog pa raya nga matsa bag-o eamang naeumos.
