KALIBO, Aklan—Nagapabilin nga maayos ro pagpatigayon it 2025 Western Visayas Regional Athletic Association ukon WVRAA Meet sa probinsiya it Antique.
Suno kay Mr. Hernani Escullar Jr., tagapaghambae it Department of Education ukon DepEd-Region 6 nga sa ikatlong adlaw makaron it pahampang, owa it anuman nga nailistang ‘major incident’ ro ahensya umpisa nga ro sporting event hay ginpatigayon ko Marso 2.
Ginpahayag ni Escullar, indi malikawan nga may mga maninahan nga mga atleta samtang nagahampang apang insigida man sanda nga ginataw-an it atensyong medikal.
Sa pihak nga parte, kuntento sigon sanda sa seguridad nga ginapatuman it kapulisan ag iba pang law enforcement agencies sa mga playing venues ag billeting areas .
Mag-eowas kara, may mga pulis man nga naka-assign sa anti-criminality operations ag police visibility.
Dugang pa ni Escullar nga ginakalipay man nanda ro pagsunod it mga nagapasakop nga student-athletes sa protocol nga andang ginapatuman partikular ro pag-warang nga owa it nagakaigo nga abiso halin sa andang mga coaches.
Sa pihak nga parte sa pinaka-ulihi nga medal tally, ro Aklan ro nagapanguna sa secondary nga may 13 nga gold, 11 silver ag 10 bronze.
Apang owa pa it nabo-oe nga gold medal sa elementary , 3 ro silver ag 14 nga bronze.
Sa paragames, ro Aklan hay nakatipon eon it 4 nga gold medal, 12 nga silver ag 11 nga bronze.
Ro pahampang hay magatapos sa marso 8 domingo nga adlaw.
