Sangka kasae sa Cagayan de Oro ro owa nadayun ko Marso 11, 2025, matapos nga gina-alegar nga nabugtaw ro groom halin sa “gayuma” nga ginasugid nga gin-obra it bride.
Ro insidente hay naging sentro it istorya sa social media kat magpaguwa it reklamo sa TikTok ro event organizers matapos ro tatlong oras nga owa pagsipot it magkarelasyon, mga bisita, ag ro judge.
Sa sangka video, makita ro bakanteng venue ag ko ulihi hay nagtuhaw ro tensyonadong pag-istorya it bride ag groom kat mag-abot sanda.
Mas pang nag-grabe ro sitwasyon kat mag-abot ro pulis ag natukiban nga may utang nga ₱500,000 ro bride para sa mga serbisyo it kasae nga ginaeakipan it pagkaon, makeup, ag dekorasyon nga owa pa nabayaran maskin piso.
Ginpadayun it organizers ro pagpahaum base eamang sa promisa it bride nga pagabayaran ro balanse sa oras nga mag-abot ro igbata nga pulitiko halin sa Davao nga magatambong sa kasae.
Dugang pa kara nga ginhambae it groom nga owa nana nasayuran ro angot sa kasae bangud sa gina-alegar nga sa idaeum imaw it “gayuma.”
Nataeupangdan man it mga saksi ro medyu owa sa kaugalingon nga hueag it groom sa adlaw it kasae ag ginasugid nga gulpi eamang nga naduea ro gahum it gayuma matapos imaw nga wisikan it asin it asawa it anang amigo.
