BORACAY, Island — Sa pihak it pilang isyu nga nagbutang sa Boracay sa kontrobersiya ko kan-o eamang, uman nga nagbisita sa isla ro luxury cruise ship nga MS Riviera it Oceania Cruise Line, adlaw it Dominggo.
Sakay sa nasambit nga cruise vessel ro masobra sa 1,200 nga mga dumueoong turista ag 800 nga mga crew members.
Uwa ginpaeampas it mga bisita ro kahigayunan nga makapanaog sa cruiseship ag naglibot sa mga ginatanyag nga tourist spot nga nagpamangha sa mga raya.
Pamatuod raya nga uwa gihapon nauulihi ro Boracay pag-abot sa mga destinasyon nga gustong bisitahon it mga turista sa andang paglibot sa mga maanyag nga tourist destination sa bilog nga kalibutan.
Nauna eon nga bumisita ro MS Riviera sa Boracay ko Pebrero 23 it presenteng dag-on.
Samtang sa pihak nga parte, sigidas ro pagpromote it lokal nga gobyerno sa Boracay agud nga mapaumwad pa gid ro turismo sa isla.
Raya hay matapos nga nakipagbahin ro LGU sa Europe Asia Alliance (EAA) Annual Global Meeting nga ginpatigayon sa sangka high-end resort sa isla.
Ro Europe Asia Alliance hay may masobra sa sa 90 miyembro halin sa masobra 80 ka mga nasyon nga sangka prestihiyosong internasyonal nga network sa freight logistics nga nagatuyong pabaskugon ro koneksyon sa bilog nga kalibutan.
Tuyo kara nga maitaguyod ag mapabilin ro Boracay bilang world-class nga destinasyon para sa internasyonal nga mga pagpueong ag kolaborasyon.
