KALIBO, Aklan — Kasunod it pagbuhos it mga turista sa Boracay ko nagtaliwan nga Semana Santa, magapadayun ro hugut nga security measures sa isla sa opisyal nga pag-umpisa it summer season.
Suno kay P/Capt. Aubrey Ayon, tagapaghambae it Aklan Police Provincial Office nga ginatutukan it mga kapulisan ro mga nagapangunang aktibidad sa lugar makaron nga bakasyon bangud sa ginaeauman nga mas pang pagdagsa it mga bisita.
Partikular eon ro uman nga pagbalik it sikat nga Love Boracay.
Preparado sigon sanda ag may bastante nga numero it mga kapulisan dugang pa ro augmentation halin sa 2nd mobile force company agud nga magbantay sa mga local ag foreign tourists.
Ginmanduan sigon ro mga kapulisan nga dugangan ro police visibility eabi eon sa gabi-i agud nga matapna ro mga krimen ag masiguro ro kaeowasan it mga bisita .
Sa pihak nga parte, nagdugang pa sa pwersa suno kana it Malay MPS ro Boracay Anti-Vice Unit, sangka specialized 22-member team nga gin deploy it Police Regional Office 6 agud nga matapna ro illegal activities ag mapabilin ro seguridad sa lugar.
Ginatutukan it nasambit nga unit ro intelligence gathering, pagtumod sa mga posibleng paeag, ag pagtapna sa operasyon it mga kriminal eabi eon ro may kaangtanan sa droga ag prostitusyon.
